ليش نحنا مو طلاب

[sad eyes]

الصور السابقه كانت من عدة جامعات بسوريا
أكيد عرفتو عن شو بدي إحكي
ويمكن تؤولو لحالكم لهلأ ماكنا نخلص من هالموضوع
أنا موإنسانه سطحيه أو مهتمه بالمظاهر
بس من حقي كطالبه درست 12سنه بالمدره إنو إدرس بمكان إسمو جامعه ويكون عنجد بيشبه الجامعه
يعني بصراحه مومعقول القاعات زغيره وإزا ماإجيت بكير راحت الأعده إدام وراحت المحاضره ولا صوت ولاصوره
بتخلص المحاضره بدنا مكان نأعد فيه
مافي
الكافيتيريا زغيره ومغمه وعلى طول مليانه لازم الواحد يحجز طاوله بالدفاتر متل مامنحجز بالقاعه
لك حتى حوض الزريعه اللي جنب المكتبه على طول مليان


طيب اللي عم يدرسو بغير جامعات بشو أحسن مننا ؟؟
ليش نحنا لأنو بدنا ندرس هالفرع حطونا بمدرسه كبيره شوي
لاولله مدرستي القديمه كانت أكبر



والأحلى من هيك إنن بستقبلو وفود بالكليه العظيمه اللي عنا


بعرف إنو الطلاب موطالع بإيدن شي
وفي طلاب عم يعانو متلي وفي طلاب صار الموضوع عندن عادي
وفي منن رح يكتبو كم كلمه مشان يقنعوني بالكليه


بس بتمنى من كل ألبي إنو يوصل كلامي لحدى يطلع بإيدو يعمل شي
يبنو كلية جديده ينقولنا على جامعه بشي مدينه مابعرف شو الحل
بس يعاملونا بالطريقه اللي منستاهلا كطلاب
ولأنو نحنا مو أقل من غيرنا م طلاب المدن التانيه

[NAPOLION MARMARITA]

انا معك ساد وبأيدك
بس لشي يلي ماعم افهمو ليش لكلية مو بحمص
وعلما انو بحمص مافي كلية للاقتصاد ونحنا تابعين لحمص و80%من الطلاب من حمص ومناطقها
مابعرف شو لحل
بس مابظن انو في حدا بيطلع بأيدو هون
مشكورة

[b a s e m]

هيك النصيب

[M A N A R]

سادو

مابعرف شو بدي قلك بس انشاء لله خير


بس في شغلة جديدة وحلوة بدهم يركبوا لنا شمسية بالكلية مشان الشمس والمطر

شي فخامة مدة التنفيذ 60 يوم شي فخامة والوان الشماسي ازرق واحمر والثالث ماعاد اتذكر ههههههههههههههههههههههه

[b a s e m]

مبروك الشمسية .. انجاز كبير لكليتنا

في اكتر من ساحة واسعة شوي بالكلية

ليش ما بيعملوها كافيتيريا زغير ( تسكيجة )

حرام الطلاب ما عم بحبوا يفوتوا عالكافيتيريا الضخمة

[Be Happy]

نعمة ..ماشي الحالة ..سايعا منيح ..حرام تظلموا ..

[b a s e m]

يلا بلاك .. خلصت هالسنتين .. ;)

[Hamadah]

عجبتني هادي لاصوت ولا صورة بس المووضوع سادو انو ويعني مافي حل كليتنا ئد الشواسما ولسا منستقبل طلاب ضعف حجم الاستيعاب يعني جد لما بخلص دوام من مدرستنا المختلطة وبرجع ع البعث بشرفي بنقهر وبحس انو لازم نبكي لحتى حدا يعبرنا
بس بالنهاية
النا الله والقلب مجروح

[b a s e m]

سؤال : لو تعرفوا كليتنا مدرسة كان جيتوا عليها ؟

[Hamadah]

للامانة انا حابب الكلية من زمان بس االموضوع انو تفاجئت بالوضع

[Samar.S]

يا جماعة انا كلما شفت الكلية بتذكر مدرستي الابتدائية
وما بحس حالي بجامعة ابدا
ومع ذلك انا حبيت الكلية كتير

[b a s e m]

في واحد ما بحب مدرستوا القديمة

[sad eyes]

إلنا الله وإلا مايجي يوم ويتحسن الوضع
بصراحه أنا ماكنت بعرف إنو هيك شكل الكليه لحتى سجلت فيها ويوم إجيت لسجل إنصدمت كتير
هالسنه نقلو كلية الحقوق والتربيه وجيرانا وحطوهن بمبنى الزراعه الجديد
وسمعت خبريه إنو بدهن ينقلو جيرانا طب الأسنان على حمص
معناها إستنادا للواقعه الأولى لازم نتفائل إنو ينقلونا مع جيرانا
على مبدأ إنو كل كليه بتتقل هيي واللي حواليها

أما بالنسبه للكافيتيريا فلما رحت على الكافيتيريا تبعت كلية الهمك (كلية الميكانيك والكاهربا ) طبعا أكيد ماحسيت أبدا بالإكتاآب وماقارنت أبدن بين كفتيريتنا وكفتيريتن
لأنو هنيك بس الواحد بحس حالو آعد بمطعم والأسعار عاديه ومو غاليه

الطلاب لما بيتخرجو من جامعهة البعث فرع حمص بصيروا يبكوا لأنن تخرجوا منا
أما نحنا الواح فينا مابيعرف إمتى بخلص دوامو اليومي


كل أمنياتي إنو يكون المبنى الجديد اللي عم ينبنى هلأ بجامعة البعث هو لإلنا

[Altyb RaWad]

لك يا سادو طولي بالك شوي ... الله يكون بعونا وتركيها لله
لك بربكون هاد حكي اليوم قاعد مثل الاطرش بزفة ماني عم اسمع شي غير الدكتور عم يحرك تموا بس .... اي والله نحنا بشر ولو
هلق سؤال من هون لسنتين يعني شو منعمل مناخد المحاضرة في الهواء الطلق اذا هيك لان فعلا فعلا في معانة
مشكورة سادو على الموضوع .. بس اختي واقع وبدنا نعيشوا

[sad eyes]

لك المشكله إنو من كون آعدين بالمحاضره بؤوم بيخطر على بال واحد آعد إدام يحرك راسو أو يعمل تمارين لرقبتو (خطي تشنجت) بصير كل الأعدين وراه عم يحركو روسن يمين شمال مشان يشوفو منيح
وبتخلص المحاضره والطلاب المساكين لسا ماعرفانيين يزبطو زاوية ميل راسن لحتى يشوفو منيح

[Altyb RaWad]

هههههه
طولي بالك ولو لسا ماشفتي شي
بكرة بتلاقي الطلاب ماعم تحرك راسا عم تحرك حالا لان ماعم يضل في محلات ... هون بتصير بتقولي ياريت كانو عم يحركو راسون لان ممكن تاخديلك نظرة خاطفة طبعا بدون صوووت
انا عايش الحالة تمام سادوا وخاصة اليوم بمحاضرة الاحصاء الثانية

[NAPOLION MARMARITA]

مابعرف شو بدي احكي
بس يلي الو حماده صح وضعنا مأساوي وببكي وعنج انا كتير متدايق انو كليتنا هيك
وبالنسبة لسمر اي جو لكلية غير منظرا
وردا عالطيب واقع بدنا نعيشو على راسي بس ليش ليعيشوا غيرنا
شباب انتو بتعتقدوا انو بيطلع بأيدنا شي نعملو مشان تحسين وضع الكلية؟
بصراحة انا حبيت لاقتصاد بس مو طايق داوم بهيك كلية
وبضل قول يارتني سجلة اي شي غير بهالكلية رغم اني حبيت لاقتصاد
لوضع عنجد مأساوي
وبالنسبة للي حكيتو سادو
انا بقلك انو لارح ينقلو لاسنان ولاشي
لمخطط انو بحما بدو يصير جامعة منفصلة عن حمص
وتابعا لذاتا

[sad eyes]

جامعه بحماه تابعه لذاتها
حلو الكلام بس إنشالله إيمتى هي بتخلص

يللايكرا الأجيال اللي بعدنا بتدرس فيا

[ozon]

بالله نحنا طلاب

[Samar.S]

سادو يمكن المبنى الجديد اللي بجامعة البعث لكلية الهندسة المعلوماتية
لأنو اختي عم تدرس معلوماتية وهيي قالتلي انو عميبنو مبنى لألن
لأنو كليتون مع كلية العلوم للأسف مو النا

[M A N A R]

نحنا رح ننتقل لمكان ماكانت المعلوماتية ياخذو دروس هيك عم يقال

يعني كلام بس شي رسمي لسى مافي

[NAPOLION MARMARITA]

طيب وولف كلامك في روح

بس برأيكن مافي شي طريقة نحرك نحنا الطلاب هالموضوع
يعني كيف بدنا نبين عن رأينا

[b a s e m]

فوت عملك غروب بالفيس بوك

[Be Happy]

امممممم
شفت الردود لقيتا كلا عم تحكي عن مبنى ومدرسة وكافتيريا ...
بالله سؤال ..تخيل حالك قاعد بمدرج في شي 2000 طالب متل كلية اقتصاد دمشق ...
وما فهمت شغلة معينة عالدكتور ...برايك رح يخليك تسأل ..اكيد لاء ما رح يفتح باب النقاش ...
بينما هون قاعدين شي 60 ل 70 واحد ..يعني في نقاش في اخد وعطا مع الدكتور ..انا هي شغلة ايجابية شفتا ...

بعدين شغلة تانية الكل مركز عالمبنى والكافتيريا ..انا ما بلوم حدا معكون حق مية بالمية ...
بس انا اللي مضايقيني مو هاد ...نظام المواد بالكلية ..
يعني بربكون هلق العربي ليش عم ندرسو بالسنة الاولى ...يعني ما شبعنا قصائد بالمراحل السابقة ..والله صرنا منعرف نحكي ...
مادة اساليب البحث العلمي ..هي المادة المفروض تعطى لمن يود انو يعمل دراسات عليا ..او انو للسنة الرابعة ...مو الواحد اول ما بيفوت الكلية بيشوف قدامو هيك مادة افكارا متقدمة ...
مادة الرياضيات العالية هي ليش ..وشو رح تفيدنا يعني ..
مو حرام يكون في ادارة 1 وادارة 2 ..مع انون التنتين بيحكو تقريبا نفس الحكي ..ليش ما بتصير مادة وحدة وبتتسمى مبادئ الادارة ...
بتعرفو اني صرت دارس 24 مادة وما شفت ولا وحدة الا علاقة باختصاصنا ...يمكن اكتر المواد اللي لهلق عم نستفيد منا هي المحاسبات ..وكأننا نحن اختصاص محاسبة ..وما النا علاقة بالتمويل والمصارف ...
لك والشي اللي بيقهر اكتر ..اني صرت سنة تالتة ولهلق عم ناخد مبـــــــــــــــــادئ ..
يعني اشتهيت شوف مادة تمويلية او مادة مصرفية ...

انا هاد اللي مقهور في بالكلية ..انو يعني بدكون تساو كلية اقتصاد بغض النظر عن المبنى وما شابهو ..لك خلي يكون لهالكلية قواعد وركائز وشي خاص فيا ..انو يعني كل كتبنا من جامعة حلب ..شو نحن فرع لكلية اقتصاد حلب ...

عندي حكي كتير ..وانا كرار كتير ..بس الواحد شو بدو يساوي ..المهم اني مقتنع بفرعي وبلاقي من وجهت نظري الافضل ..وانا بفضلو عن الطب والصيدلة لاني بحب دنيا الاعمال ..وان شاء الله منشوف شي مادة الا علاقة باختصاصنا عن قريب ...

[b a s e m]

حيوا بلاك ..

انا شفت احدى الردود لأونك
انو اذا شلنا المواد المو لازمة بالسنين التلاتة الاولى
فينا نختصرها بسنة